‘Akatopa, Tāpoki, ma te Mou
Ko te ‘Akatopa, Tāpoki, ma te Mou, te rāvenga tau i te rave, i roto i teta‘i ngāruerue ‘enua. ‘Āpi‘i‘ia koe i te ‘Akatopa, Tāpoki, ma te Mou.
Tei runga i teia kapi
Te rave‘anga i te ‘Akatopa, Tāpoki, ma te Mou
Ko te rāvenga pu‘apinga rava atu o te ‘Akatopa, Tāpoki, Mou, koia ‘oki, ko te mea te ‘anga‘anga ra no to‘ou kopapa.
‘Akatopa ki runga i to‘ou nga rima, e nga turi, me kore ra, te turanga ‘aka‘aka rava atu te ka rauka iākoe. Ka pāruru teia iākoe kia kore e ‘inga, ināra ka rauka iākoe i te neke me anoano koe. Pange iākoe ki runga i teta‘i pāruru, me kore ra, i teta‘i āpinga mātūtū, me kare e rauka iākoe i te ‘akatopa ki raro.
TĀPOKI i to‘ou upoko e te kakī (me kore ra, i to‘ou kōpapa katoatoa, me ka rauka) ki raro ake i teta‘i kaingākai mātūtū (mei tei roto ua i nga taka‘i‘anga e rua ki te pae iākoe). Me kare e ngā‘i ‘akaruru‘anga i te pae mai, tāpoki‘ia to‘ou upoko, e te kakī, ki to‘ou nga rima.
MOU ki to‘ou ngā‘i ‘akaruru‘anga (me kore ra, to‘ou ngā‘i no te pāruru‘anga i to‘ou upoko, e te kakī) kia ‘akaoti rava te ngāruerue‘anga. Me te nekeneke ra te ngāruerue‘anga i to‘ou ngā‘i ‘akaruru‘anga, neke atu i te āru i te reira.
Te au rāvenga tūkētūkē no te ‘Akatopa, Tāpoki, ma te Mou
Me kare koe e rauka i te ‘aere meitaki, me kore ra, e ta‘anga‘anga ana koe i teta‘i tokotoko
Me kare koe e rauka i te ‘aere meitaki, me kore ra, e ta‘anga‘anga ana koe i teta‘i tokotoko, ‘Akatopa, Tāpoki, ma te Mou, me kore ra, No‘o, Tāpoki, ma te Mou.
‘Akatopa ki te turanga ‘aka‘aka rava atu te ka rauka iākoe, me kore ra, no‘o ki runga i teta‘i no‘o‘anga, ki teta‘i tua o te ro‘i, me kore ra, ki runga i teta‘i tōpa.
Tāpoki‘ia to‘ou upoko, e te kakī, ki to‘ou nga rima e rua. Piko pakari i to‘ou kopapa ki runga i to‘ou ‘ū‘ā. ‘Aiteite rāi teia ki te turanga pange, i roto i te pa‘īrere. ‘Akarukena‘ia ta‘au tokotoko ki te pae iākoe, ei ta‘anga‘anga na‘au me ‘akaoti ana te ngāruerue‘anga.
Mou kia ‘akaoti rava te ngāruerue‘anga.
Me e ta‘anga‘anga ana koe i teta‘i ‘apinga tauturu i te ‘aere, me kore ra, i tetai no‘o‘anga ‘ōparapara
Me e ta‘anga‘anga ana koe i teta‘i ‘apinga tauturu i te ‘aere, me kore ra, i teta‘i no‘o‘anga ‘ōparapara, Roka, Tāpoki, ma te Mou.
Roka‘ia to‘ou uira, ma te neke ki te turanga ‘aka‘aka rava atu te ka rauka iākoe.
Tāpoki‘ia to‘ou upoko, e te kakī, ki to‘ou nga rima e rua, me ka rauka iākoe. Piko pakari i to‘ou kopapa ki runga i to‘ou ‘ū‘ā. ‘Aiteite rāi teia ki te turanga pange, i roto i te pa‘īrere.
Mou kia ‘akaoti rava te ngāruerue‘anga.
Me tei runga koe i te ro‘i
Me tei runga koe i te ro‘i, no‘o ki runga i te ro‘i, ma te tāpoki iākoe ki te au tāpoki ro‘i, ma te pāruru i to‘ou upoko, e te kakī, ki te urunga moe.
Meitaki ake koe i te no‘o ki runga i te ro‘i, kia kore koe e kino.
Me tei va‘o koe
Me tei va‘o koe, neke no teta‘i nga taka‘i‘anga ua, mei ko i te au ‘are, te au pu rakau, te au mōri-mataāra, e te au poupou uira, i reira ka ‘Akatopa, Tāpoki, ma te Mou ei.
Me tei roto koe i teta‘i elevator
Me tei roto koe i teta‘i elevator, ‘Akatopa, Tāpoki, ma te Mou.
Me ‘akaoti ana te ngāruerue‘anga, tautā i te ‘eke atu ki va‘o, ki te ta‘ua vaitata rava atu, me ka rauka iākoe i te rave, i raro ake i te turanga pōnuiā‘au.
Me te ‘aka‘oro ra koe
Me te ‘aka‘oro ra koe, tāpū ki ko i teta‘i ngā‘i āteatea.
Tāpū. Tiaki ki reira, ma te tāmou ua atu rāi i to‘ou ruru-mōtoka, kia ‘akaoti rava te ngāruerue‘anga.
Me ‘akaoti ana te ngāruerue‘anga, neke meitaki, ma te kape i te au ‘ana, me kore ra, i te au ngā‘i ‘akakake‘anga, i te mea e, kua kino āinei pa‘a.
‘Āpi‘ipi‘i‘ia ta‘au ‘Akatopa, Tāpoki, Mou
E mea pu‘apinga te ‘āpi‘ipi‘i‘anga i te au rāvenga tau i te rave, kia kite koe i ta‘au ka rave, me tupu ake teta‘i ngāruerue ‘enua.
E ‘akatupu‘ia ana te ma‘ata‘anga o te au kino ki te kopapa, e te au mate, na roto i te au ‘apinga e purupururū ana ki runga i te tangata, i te tuātau ngaruerue‘anga ‘enua, kare e na te au ‘are mama‘ata tei ‘inga‘inga. Ka anoano‘ia koe kia ‘āpi‘ipi‘i, i te rāvenga ‘AKATOPA, TĀPOKI, MOU, te ka ‘anga‘anga no‘ou, i te ma‘ani i te reira, i te mea mua ka rave koe, me ‘akamata te ‘enua i te ngāueue.
Ko te rāvenga pu‘apinga rava atu o te ‘Akatopa, Tāpoki, Mou, koia ‘oki, ko te mea te ‘anga‘anga ra no to‘ou kopapa, tei ‘āpi‘ipi‘i ana koe.
‘Āpi‘ipi‘i‘ia ta‘au ‘Akatopa, Tāpoki, Mou:
- I te au mata‘iti tatakita‘i no te New Zealand ShakeOut
- Me ‘ākara matatio koe i ta‘au parāni, me kore ra, au ‘apinga no te tuātau manamanatā tupu po‘itirere
- I te au tuātau mātau‘ia na roto i te mata‘iti, mei te daylight savings.
Te ‘akakitekite‘anga no runga i te turanga ponuia‘au i te tuātau ngāruerue‘anga ‘enua ‘irinaki-kore
Tei runga teta‘i atu ‘akakitekite‘anga, no runga i te mea tau i te rave i te tuātau ngāruerue‘anga ‘enua, i te ‘ātuitui roro uira. Kare e pu‘apinga ‘aka‘ōu ana te ma‘ata‘anga, e tau kia kore e āru‘ia.
Te turu nei te kimikimi‘anga kite mei roto mai i te United States, Taiwan, Japan, e Aotearoa, e te tamanako nei i te ‘Akatopa, Tāpoki, e te Mou. E au basileia pouroa teia, e earthquake-resistant building design codes, to ratou.
Te au rāvenga tauturu
Tāmou‘ia te tumu i riro ei te ‘Akatopa, Tāpoki, ma te Mou, ei rāvenga tau i te rave, i roto i teta‘i ngāruerue ‘enua, i roto i te factsheet, i roto i te reo Papa‘ā
Ko te ‘Akatopa, Tāpoki, ma te Mou, te rāvenga tau i te rave, i roto i teta‘i ngāruerue ‘enua. ‘Ākarakara‘ia teia vitiō poto, tei roto i te reo Papa‘ā, no te kimi‘anga i teta‘i atu no runga i te ‘Akatopa, Tāpoki, ma te Mou.
Akapae‘ia mai ma te nene‘i i teia au posters ki roto i te reo Maori Kuki Airani ma te tuku atu i tē reira au mea ki runga i tēta‘i ngā‘i i roto i tō‘ou ngutu‘are, i te āpi‘i, mē kore ra, i te ngā‘i anga‘anga. Kia ma‘ara i te Akatopa Ki Raro, i te Tāpoki ē te Mou, i te tuātau ō te ngāruerue-enua.
pdf | 1.4 MB
pdf | 927 KB
pdf | 1.3 MB
pdf | 1.3 MB
Kiriti‘ia, ma te tu‘atu‘a atu, i teia factsheet no runga i te au mea tau kia rave‘ia, i mua ake, i te tuātau e tupu ra, e i muri ake, i teta‘i ngāruerue‘anga ‘enua.
Te au tu manamanatā
Ra‘ira‘i ua atu te au manamanatā nātura, i roto i Aotearoa. Kimi‘ia te au rāvenga tau, i mua ake, i te tuātau e tupu ra, e i muri ake, i teta‘i ua atu tu manamanatā tupu po‘itirere.
